“Tichuan lei leh vân chu an chunga awmho zawng zawngte nên chuan siam zawh a ni ta a. Tin, Pathianin ni sarih nîah chuan a thîl sìam chu a ti zo va: ni sarih nîah chuan a thîl sìam zawng zawng chu a chawlhsán ta a. Tichuan, Pathianin ni sarih nî chu mal a sâwm a, a serh ta a: chu mi nîah chuan Pathianin a thîl sìam zawng zawng, thu ngawta a siam leh kuta a siamte chu a chawlhsán tak avângin,” tiin (Genesis 2:1-3).

Pathian Lekha Thù Ang Zelin

1. Pathianin Sabbath a siam hun chu thîl sìam zawh kár tâwpah a ni.

2. Pathianin Sabbath a siam dàn chu ni khat pûm tàwp a ni—a ni sarih nî chu—a châwl a, mal a sâwm a, a tithianghlim ta a ni.

3. Sabbath chu a ni sarihna nî ngei kha a ni. Chu nî ngei chu la hrangin, Sabbath a siam ta a. Sabbath chu chu ni sarihna nîah chuan belhbawm a ni lo. Chu nî sarih ni ngei chu Sabbath a ni zâwk. “A ni sarih nî chu LALPA i Pathian tân Sabbath a ni e,” tiin (Exodus 20:10).

“Sabbath ni thianghlim taka serh tur a ni tih hre rêng rawh,” tia thupêk kan ni a (Exodus 20:8). Sabbath chu nî sarihna aṭanga hmun danga dah theih leh sáwn theih chi a ni lo. Sabbath chu a ni sarihna kher hi a ni.

Chuvângin, chu nî Pathianin mal a sâwm nî chu, Sabbath aṭangin a lák chhuah theih ngai lo tih leh, Pathianin mal a sâwm, kha nî aṭang khân Sabbath pawh a lák chhuah theih bawk hek lo tih kan chiang thei a ni. Sabbath leh ni sarihna hi thuhmun a nih vangin ṭhen hràn theih a ni lo. Kár tluana nî zawng zawngte hi Sabbath a ni vék thei lo, a chhan chu a ni sarih nî chu Sabbath a ni tih leh, Sabbath nî chu ni sarih nî a nih tlat vâng a ni.

Krista leh Sabbath Chu

Sabbath Siamtu chu Kristiante rinna Siamtu tho a ni—Pathian fapa, Isua Krista chu. Amah chauh chu khawvêl hi ni rûk chhûnga siamtu chu a ni. Tichuan, a ni sarih nîah chuan a châwl a, chu nî chu mal a sâwm a, a tithianghlim ta a ni.

Pathian Lehkha Thù-in heti hian a sawi a, “A tîrin Thu a awm, Thu chu Pathian hnênah a awm, Thu chu Pathian a ni. Chu mi chu a tîrin Pathian hnênah a awm. Engkim a zain ama siam a ni; thil siam zawng zawng hi ama siam loh eng mah a awm lo. Ani chu khawvêlah a awm, khawvêl ama siam a ni, khawvêlin amah a hre si lo. Tin, Thu chu tisaah a lo chang a, kan zingah a awm ta a, (Pa fa mal neih ropui angin a ropuizia kan hmu,) khawngaih leh thutakin a khat,” tiin (Johana 1:1-3,10,14 KJV).

“…A Fapa hmangaih taka….Ani chu hmuh theih loh Pathian anpui, thil siam zawng zawnga piang hmása ber chu a ni a; amahah chuan engkim siam a ni a, vâna awmte, leia awmte nên, hmuh theihte, hmuh theih lohte nên, lalṭhutphahte pawh, rorêlnate pawh, lalnate pawh, thuneihnate pawh; engkim ama siam a ni, ama ta tùr bawka sìam a ni,” (Kolossa 1:13, 15,16).

Isuan Sabbath chu mi zawng zawng tân A siam a, hnam khat tân emaw pâwl khat tân bik chauh emawa siam a ni lo. “Sabbath hi mihring tâna siam a ni,” tiin (Marka 2:27).

Hê thu hi Carlyle B. Haynes-a thuziak, “The Attempt to Change God’s Holy Day From Sabbath to Sunday,” (Hagerstown, MD: Review and Herald Publishing Association, 2005), PP. 13, 14. tih bu aṭanga lák chhâwn a ni.