Mi ṭhenkhat chuan Hebrai bûng 4-a ni sarih nî Sabbath thupêk chu dân (decalogue) zing a mi, Kristaa thlarau chawlhna kawhhmuhtu hlìmthlá dân angin an sawi țhin a ni. Thuthlung Hluia inthâwina ten kraws-a Krista thihna a lo entîr lâwk ang khan Sabbath pawh hi Krista thihna entir lawktu hlimthla rawngbawlna niin an ngâi a. Kristaa “thlarau chawlhna” an hmuh tawh chuan, Sabbath serh kher a ngai tawh lo, tiin an zirtîr a, ni sarih nî serhna chu mimal thiltih leh sal tânna chi khat angin an zirtîr a ni.

Hebrai bûng 4-a thuchah bulpui ber chu khawngaihnaa ringtute chawlhna chungchang tarlan a ni. Tin, Hebrai 3:7-4:11-a thuchah hi Juda Kristiante tâna rinnaa chhèlna, an pi leh pute anga rin lohna leh thuâwih lohnaa tlù ve lo tùra tihna a ni. Mahse, Hebrai bûng 4-a Sabbath thu hi chu Krista-a chawlhna hlimthlâ ni lovin, chu chawlhna awmzia hrilhfiah a ni zâwk.

Hlìmthlâ emaw a anpui emaw chuan Isua tihhlawhtlin tawh, a lák kian tawh chu a kâwk a. Entîr nân: Inthâwina Beram no anga Krista a thih a, biak bûk puanzár chu chung lam aṭanga hnuai lam thlenga a thlêr khân, chu chuan inthâwina kalphûng zawng zawng a tâwp vék tawh a nihzia a tár lâng a ni. Kraws-a thil lo thleng turte lo entirtu hlímthla rawngbawlna kha Isuan a taka a hlen kim tak avangin inthawina atan beram hlan a țul tawh lo.

Israel-ten Insua inhlanna lo awm tur an thlir lawk thiam theih nana hlimthla rawngbawlna an neih țhinin a kentel serh leh sang dan zingah thu sàwmpêk hi a tel ve lo va. Pathian dân thianghlim chu chatuan atân a ni a, a bo ve hauh lo (Sâm 119:160).

Sabbath hi Juda-te tân chauh a ni, tia zirtir hi dan sawm ațanga thupêk palina paih bo tumna mai a ni. Sabbath hi mihring tana phurrit, Isuan an tihbo tur niin sawi a ni țhin a. Mahse, Sabbath hi Pathianin phûrrit ni turin a siam ngai lo hrim hrim a ni. Sabbath phûrrit tia sawi chu dik lo taka Sabbath kawihherna mai a ni.

Sabbath hi Judate tân chauh a ni lo vin, kan khawvêla sual a lo luh hmá daih, leilung siam a nih lai khan mihring zawng zawngte tâna malsâwmna ni tura siam a ni. Thuthlung Hluia Sabbath dik taka serhna chungchang ziahna te chuan zalênna, damna leh hlimna tarlanna min hmuhtir a. Isaia 58:13,14-ah hian Sabbath serhnaah malsâwmna danglam bik tak a awm tih min hrilh:

“Sabbath bawhchhe lo tûra, ka nî thianghlima i duh zâwng ti lo tûra i kephah chu i hawi kirtîr a, Sabbath lâwmawm i tih a, LALPA nî thianghlim chu zahawm i tih a, mahni kawng zawh lova, mahni nawmsâng bâwl lova, mahni thu sawi lova i cháwimâwi chuan, LALPA chungah chuan i lawm ang a, leilung hmun sângahte chuan ka chuantîr ang chia; i pu Jakoba rochun thilin ka châwm ang che: LALPA kâ chuan chu chu a sawi tawh a ni,” tiin.

Ringtu-in Sabbath a serh hian, Krista chhandamna hna thawh a pawm a, ama hnathawh a chawlhsan ṭhin. “Israela thlahte hnênah chuan, ‘Ka sabbath-te hi in serh ngêi ngêi tur a ni; in thlahte thlenga keimah leh nang mahni inkâra chhinchhiahna a ni si a; kei hi LALPA nang mahni tithianghlimtu che u ka ni tih in hriat theih nân,” tiin (Exodus 31:13). Sabbath chu Pathianin min chhandam tih chhinchhiahna a ni. Keimahin kan inchhamdam thei si lo.

Rinna avânga chhandam chhinchhiahna dik tak chu Sabbath-ah hian kan hmu a. Thiltih avânga chhandam chhinchhiahna chu mihringte’n Sabbath an thlâk danglamnaah hian hmuh theih a ni ang. Miten Pathian dân hnâwla, anmahni duhthlanna ngeia ni serh an tum hian khawngaihnaa chawlhna dik tak ni lovin, anmahni thiltih avânga chhandamna hlawh chhuah tumna a ni zâwk. Sakhaw diklo zawn chhuah nan chuan chawlhni lem an ser hem tih hriat aia țha kawng dang a awm lo. Pathian kawng emaw, mahni kawng emaw, thlânnaah a innghat tak zêt zêt a ni.

Hebrai bûng 4-ah hian Israel fate kha, an sal tânna aṭanga an chhuah lai khân, Pathianah rinna an nei tlat a ni chuan, khawngaihna zara thlarau chawlhna an hmu dâwn tih a tár lâng a. Inthâwina kalphûng chuan, chanchin ṭha a kawhhmuh a. Chutiang bawkin, Davida hun lâia Israel fate tawn hriat ang tho kha, Joshua huna mite pawh khân, khawngaihnaa chawlhna chu an lo dai hriat ve tawh bawk a ni.

Pathian khawngaihna tawnghre tura thutiam chu kan tân pawh a la awm reng a; mahse, chu Isua rinna kan nunpui aṭanga chauhva lo thleng tùr a ni. Chutiang rinna chuan Pathian dân zawng zawng záwmnaah a hruai a (Johana 14:15), thupêk pali-na, Sabbath, dah bo tùra hrilhtu mihringte thurochhiah (tradition) min hnawltir a ni.