Bible-ah hian kár khata nî țhenkhata thilmak danglam tak tak thlengte tarlan a ni a, mahse, chung nite chu serh thianghlim tùra Pathian thupêk a awm hauh lo.

Entîr nân: Zirtâwp niah kan sual vangin Isua a thi a. Thi tura kan chunga rorelna la kiang a, chhandam kan nih theih nana Krista inhlanna a nih miau avangin hun kal tawh zawng zawnga (history) thil thleng pawimawh ber a ni. Mahse, Báibûl ziak pakhat tê mahin hê ni pawimawh tak mai hi kan serh tùr a ni tih a tárlang hauh lo.

Nimahsela, Báibûlah hian a thawhlehna hriatrêngna tùr thù a awm a; mahse, chu chu thianghlim taka Sunday serhna a ni lo. Tirhkoh Paula’n heti hian a lo ziak a, “Chuvângin, a thihnaah baptisma kan chànin, a hnêna phûm vêin kan awm; Pa ropuinain mitthi zing ata Krista a kaih thawh ang khân, keini pawh nunna tharin kan awm theih nân,” tiin (Rom 6:4).

Baptisma hi Krista a thihna, thlana phum a nihna leh thawhlehna hriatrêngna a ni.

Mi ṭhenkhat chuan Krista zirtîrte chu A thawhlehna lâwm tûrin, Sunday nîin pindàn chungnungah an inhmu khâwm a ni tiin an zirtîr a. Mahse, Báibûla a inziah dàn nên chuan, thil inperhsan tak a ni lawi si. Luka chuan A thawhlehna mit ngeia hmutute a hmáchhâwnnaah chuan, an “ring lo” tiin a ziak (Luka 24:11). Heti hian Marka chuan a lo chhinchhiah a, “Tin, chu mi hnuah chuan an zinga mi pahnih ram lam pana an kal laiin hmel danglam puin an hnênah a inlâr leh a. Tin, anni chuan zirtîr dangte an va hrilh a, anni thu pawh chu an àwi chuang lo. Tin, chu mi hnu lehah chuan chaw an kil laiin sawm leh pakhatte hnên ngeiah a inlâr a, a thawhleh hnua a hmutute thu chu an awi loh avângin an rin loh leh an thinlung sak kawngah chuan a zilh hau ta a,” tiin (Marka 16:12-14, emphasis added).

Pindàn chungnunga zirtîr tumahin Krista chu a tho leh tih an rin loh chuan, A thawhlehna chu hlim takin an lâwm theih hauh lo vâng! Johana chuan an awmho chhan hêng thùte hian a sawi fiah a: “Tin, chu mi ni, ni sarih nî hmása berah, khua a lo tlai lamin, Judate hlauh avânga zirtîrte awmna kawngkhârte chu an khâr hnu chuan, Isua an zingah a lo ding a, an hnênah, “In chungah thlamuanna awm rawh se,” a ti a. (Johana 20:19).

Isua chu kár khat zinga ni hmása ber, Sunday tûkah a tho leh a ni tih hi thudik a ni. Hun mak ropui leh kan chhandamna atâna pawimawh chu a va ni êm! Nimahsela, Pathian Lehkha Thu-ah Sunday ni serhna pakhat mah hmuh tur zu awm lo va. Sunday ni thianghlim taka serh tur a ni tih Bible-ah finfiahna pakhat mah a awm lo va, chutiang zawnga zirtirna fiah tak emaw, an tháwi talin emaw, a awm hauh lo. Chutih laiin, ni sarih nî Sabbath serhna innghahna bul ṭhut chu Pathian thupêk a la ni rêng a ni (Exodus 20:8-11; Deuteronomy 5:12-15).