Tun hnai deuh ațang khan chàwlhhahdamna ni leh chibai bukna ni a hranga neih mai hi a țha mai lawm ni, tia ngaihdan nei an awm a. 

Entir nân: Hla phuah thiam leh zai thiam ni bawk, Michael Card-a, leh zai thiam tho, Steven Green-a, ten an sawi dânah chuan, Sabbath niin an chàwl a; mahse, tualchhûng mite nên Sunday niin chibai buk inkhawm an neiho ṭhin. Nimahsela, hetiang hi Isua emaw, tirhkoh Paula emaw, khân, an chíng ngai lo. Sabbath nî chu awm âwl mai mai nan leh Sunday nî chu chibai buk inkhawm nan an hmang lo (Luka 4:16; Tirhkohte 17:1,2). Hêng mite hian a ni sarih nî Sabbath chawlhna chungchâng Pathian thutak an hriatnaah chuan a lawmawm hlê a; mahse, Siamtu chu chibai kan bûk tak tak dâwn a nih chuan (Thupuan 14:7), eng vângin nge Amah ngeiin a thlan chhuah nîah chuan chibai kan bûk mai loh vang? (Genesis 2:1).  

Tu emaw hnena thilpek kan pek dawn chuan kan duhzawng kan thlang châwk țhin. Nimahsela, mi dang tihlâwm kan duh tak zet a nih chuan, an duh zâwng zawnchhuah phawt chu kan tih tur a ni zâwk dâwn lo’m ni? Chutiang bawkin, Pathianin eng nî nge a duh tih chu a thup lo va, hei hi a tiam hial zâwk a: “Mi chawimâwi apiang chu, ka chawimâwi ang,” tiin (1 Samuela 2:30).

Thawm dang zawng zawng a reh ṭhuâp laiin, Pathian nena hun hmang dun tura kohna aw Pathian Lehkha Thu kaltlangin i hre ngai lo em ni? Isuan, “Nangni thawkrim leh phûrrit phûr zawng zawngte u, ka hnênah lo ula keiman ka chawlhtîr ang che u,” a ti a sin (Mathaia 11:28).

Ziaktu pakhat chuan heti hian a lo ziak a, “I ngaihpawimawh thil zawng zawng dahțhain, Pathian hnenah i nun leh hun chu a ni bik serhna hmangin i hlan thei dawn lo em ni? (Sabbath Rest, Kevin Morgan).