Sabbath hi Pathian dan danglam thei lo zing ami, Paula pawhin “thianghlim, dik, leh țha” (Rom 7:12) a tih a ni a, chuvangin kan zawm ngei a țul a ni. Mahse, serhtan erawh chu Juda hnam tihdan zîng ami, serh leh sáng dân, Kros-a tawp ta zinga pakhat, a nih vângin, kan ti chhunzawm ta lo a ni. Paula, “Serh tan tawh koh an awm chuan tihbo tum suh se, serh tan loh koh an awm chuan tan suh se. Serh tan hi eng mah a ni lo va, tan loh pawh eng mah a ni hek lo, a pawimawh chu Pathian thupêk zawm hi a ni,” (1 Korinth 7:18-19) tiin a ziak a.

Serhtan kha Mosia dâna tel, thlalêra Juda mi maktaduai khat aṭanga maktaduai hnih vêlte hrisel leh him taka an khawsakho theihna tura Pathianin a pêk, serh leh sáng dân (ceremonial law) a ni. Thlahtubulte, zirtîrte leh midang tuten emaw, Jentail-te hnenah engtik laiin nge Mosia dân zawm tura thu an pek le? A nih leh, thuneitu zingah tunge Sunday serh tur te, eng ni mah serh lo tur te, ni sarih ni serh lo tura thu pe le?

Judaten Pathian thupêk pakhat an zawm a nih chuan, hnam dangte tan pawh zawm ve ngai a ni lo em ni? Thusâwm pêk hi Mosia phuah a ni lo va, Lalpa thu a ni zawk. Thusâwm pêk sawi/tarlan a nih hmáin “Pathianin hêng thu zawng zawng hi sawi a,” tiin Bible chuan a sawi a (Exodus 20:1-17). Pathian dân chu khawvêl zawng zawng tân a ni. “Dânin eng pawh a sawi apiang chu, Dân thû thûa awmte hnênah a sawi a ni tih kan hria a; kâ tinrêng a chîp theih nân leh khawvêla mi zawng zawng Pathian rorêlin an awm theih nân.” (Rom 3:19). Dan chu mihring tan a nih loh chuan, tumah Pathian hmáah thiam loh chang an awm lo.

Chumai bákah, mi zawng zawng chu dan, uire leh tualthah phal lotu, hmanga rorêlsak tur an ni (Jakoba 2:10-12 en la). Chu chu he thusâwm pêk dân hi a ni. Mahse, mite chu dân an zawm ngai miah loh hmanga rorelsak an ni lo. A awmzia chu zawm tura pek dan hmang chauhin mihringte chu rorelsak tur a ni. Chuvângin, Jakoba’n dân hmanga rorêl a ni dâwn tih a sawi si avângin, mi zawng zawngin thusâwm pêk dan chu zawm ngei a țul a ni [Chu dan zawm chu mihring tan tihrual ni lo mah se, Pathian nen chuan engkim a tih theih thung si] (Mathaia 19:26).

Adapted from H.M.S. Richards, Hard Nuts Cracked, The Law of Circumcision.