Dânin a sawite zawm a ngaih si loh chuan tualthah, rukruk, leh uire te hi a thiang ta mai tihna em ni ang? Chu chu Paulan lehkha thu leh thlarau dan chungchang a sawi awmzia a ni lo. Dân thu ziak (form of the law) leh thlarau dan hi inzawm tlat a ni a. Chuvângin, thlarau dan bawhchhe lovin dan thu ziak a takin kan bawhchhe ngawt thei lo.

Krista leh apostol-te hun laia Judate sakhua kha hmasialnaa khat, tih dan phung pangaia kalpui a ni a. Ṭhenawmte an hmangaih vâng leh Pathian an hmangaih vâng ni lovin, mite hmuh tur chauhin thîl ṭha an ti ṭhin. Tlang hriata dan bawhchhetu chu na taka an dem laiin chu aia tenawm zawk sual chu an ti țhin. Dan lehkhaa ziakin a phut, entir nan serh tan dân, chu kherkhiap takin an zawm a; mahse, chung mite chuan dân an bawhchhe zawk a ni, tiin Paulan a ziak (Rom 2:27,28).   

Judaten tih dan phunga khauh tak an neih chu an rante pawh Sabbath nia chawlhtir a ni a. Mahse, Siamtun hna ropui zawk a pek, an mihring puite tân malsàwmna ni tura rawngbawl chu an ngaihthah a. Mite chu rûk ru lo tûrin thù an pe a, mahse, Jentail-te nên sumdawnna kawnga an indawrtawnnaah an hlawkna tur a nih chuan rinawm lo takin thil an ti a, chu chuan Pathian hming a tichhe hle thin.

Chutiang chiahin, tûnlaia mi ṭhenkhat pawhin Pathian dân bawhchhe rêng chungin an sakhaw  tih dan lár tak takte uluk takin an kalpui a. Mi tam tak chuan ṭhenawmte car an ru ngai kher lo vâng, nimahsela, rûkrute hremna dan kenkawh kawngah an khauh hlê thung si; chutih rualin sumdawnna chungchangah an thenawmte tihchhiat vek an pawisa lo thei bawk. “Nangmah i inhmangaih angin, i vêngte i hmangaih tùr a ni,” tih Pathian Lehkha Thu, Lal dân chu an zawm si lo va. A chhan chu, mahni hmasialna––– zahawmna hloh leh puh hmingchhiatna hlauh vang chauha dân an zawm vang a ni.

Thinlung taka Sabbath serhna hian mahni hamțhat umna avanga sakhuana  chu a siamțha a. Thlarau dân zawm thei tûrin min ṭanpui ṭhin a ni. Pawnlam lan mawi nan leh mi dang lak ațanga hamțhatna duh vang chauha Sabbath serh chuan Sabbath thiltum laimu a phawkchhuak zo lo. Thinlung taka Sabbath serhna kawng awm chhun chu mahni hmasialna tel lo hmangaihna te, Pathian thil siam leh tlanna thiltihtheihna ngaihhlutnain a siam țhin.

Lehkha thu zawm lo vin, thlarau dân zâwk chauh zawm tura phût kan ni em? Elementary school zirlai bûah he thuziak hi chhiar angin han ngaihtuah la: ‘Jane-i chuan a chakna zawng zawngin ball a pet a.’ “A chakna zawng zawng” tih hian a ball pet dan min hrilh a. Jane-i khân, ball pet tak tak miah lovin ball kha a theihna zawng zawngin a pet thei ang em? Thlarau dân chuan engtin nge dân kan zawm ang tih min hrilh a. Chuvângin, thlarau dân chu a lehkha ziak tello vin kan zawm thei ang em le?