Mi tam tak, Kristiante leh Christian ni lem lote pawhin, ni sarih nî Sabbath—Bible-a Sabbath awm chhun chu—“Judate Chawlhni” bik angin an sawi ṭhin a. Nimahsela, chutianga an sawi ṭhin chu a dik rêng em?

Kum zabi tam tak chhûng chu Juda kùlmûkte chuan kar khata a  ni sarih nî, Sabbath, chu an serh tih kan hria a. Mahse, chu bak thil dang a la awm cheu em? Sabbath hi Pathianin Judate chauh serhtîr a tum rêng em?

A chhânna hmu tur chuan, hun kal tawh–Juda hnam pian hmá, hmánlâi hunah khân kan kir leh a ngâi a. Dik tak chuan, khawvêl leilunga nunna lo inṭanna lamah kan lêt leh a ngâi a ni. Genesis 2:1-3 hi i han bihchiang dâwn ang hmiang: “Tichuan, lei leh vân chu an chunga awmho zawng zawngte nên chuan  siam zawh a ni ta a. Tin, Pathianin ni sarih nîah chuan a thil siam chu a ti zo va: ni sarih nîah chuan a thil siam zawng zawng chu a chawlhsan ta a. Tichuan, Pathianin ni sarih nî chu mal a sàwm a, a serh ta a: chu mi nîah chuan Pathianin a thil siam zawng zawng, thu ngawta a siam leh kuta a siamte chu a chawlhsan tak avângin.” tiin.

Pathianin hê leia nunna a siam zawh hnu lawkah, a hnathawh chu a chawlhsan ta a, a serh a, ni sarihna chu mal a sâwm a, a tithianghlim ta a ni tih Bible-in min hrilh a ni. “Malsâwm” tih awmzia chu a chiang viau a; mahse, “tithianghlim” tih hi eng nge a awmzia ni ta ang? Pathianin kar khat chhûnga ni rûk dang zawng aia, a ni sarihna nî a siam danglam bikna hi eng nge ni?

Genesis bung 2-a tihthianghlim tih awmzia chu Pathian tana dahhran tih te, thianghlim tura siam tihna te, a kawk a ni. Ni sarih nîa kan chawlhhahdam theih nan Pathianin entawn tur min pe a. Khami hun aṭang khân, Sabbath chu chawlhna ni thianghlim leh Siamtu nêna lendunna ni atân hman tur a ni. Hun bik, thilsiam zawng zawng siam zawh kar tâwpa awm/thleng, a nih vangin Sabbath chu mihring zawng zawngte tân hman ațanga vawiin thlengin ruahman a ni tih a chiang hlê.

Hei hi Isua thusawi hian a tichiang zual âwm e: “Sabbath hi mihring tâna siam a ni a, mihring hi Sabbath tâna siam a ni lo,” tiin (Marka 2:27).

A hnuah, Juda hnamte hnêna Dân sàwm pêk a nih khân, Pathianin a bik takin thupêk palinaah chiang takin a tárlang leh ngat a, “Sabbath hi thianghlim taka serh tur a ni tih hrereng rawh,” tiin (Exodus 20:8). Pathianin eng vângin nge an theihnghilh mai loh nân “hrereng” tura a chah le? A chhan chu, hêng Hebrai mi; Aigupta sal tânna aṭanga chhanchhuah hlim hlawlte hian, hun rei tak aṭanga lo din tawh Lalpa Sabbath chu, saltâng an nih laiin antheihnghilh tawh vâng niin a lang.

Dik tak chuan, mihringte hian Pathian Dân chu Sinai tlânga pêk a nih hmá tawh khan an lo hre daih tawh a. Entîr nân: Josepha chuan Potifar-a nupui hnênah heti hian hnáwlna a sawi a, “Engtin nge he sual lian tak hi tiin Pathian chunga thil ka tihsual theih ang?” a ti a, tiin (Genesis 39:9). Dân sàwm pêk a nih hmá daih tawhin, Josepha hian uirena hi Pathianin a phal lo a ni tih a hre daih tawh a ni.

A tâwp berah chuan, lei tharah pawh Sabbath chu kan la serh zêl dâwn a. Isaia 66:22,23-ah heti hian a sawi a, “Vân tharte leh lei thar ka la siam tûr chu ka hmáah a awm reng dâwn angin…..chawlhni aṭanga chawlhni dang thlengin mi zawng zawng ka hmáah chibai mi bûk tûrin an lo kal zût zût ang, LALPAN a ti,” tiin.

Sabbath chu mihring zawng zawngte tâna a bik taka Pathian thilpêk hlú tak a ni. Chumi awmzia chu Ama anpuia a siamte tâna chatuan malsâwmna a ni.