Sabbath ințan hun zawh chu thluak hmang lo zawhna tih mai a awl viau mai thei. Mahse, tûnlai ni chhiar ang, zanlai dar 12-a ni chhiar țan a, zanlai dar 12-a a tâwp ang hi, khawvêl siam a nih aṭanga Bible hun thleng khan hman a ni ve lo. Genesis 1:5 in heti hian a sawi a, “Tlai lam awm a, zíng lam a awm bawk a, a ni khatna chu,” tiin. Ni khat chu a hmá ni tlai ni tlákah a inṭan a, a tuk tlai ni tlákah a tâwp. Zân lam a hmasa zêl a; tichuan, nî chhuakin a chhunzawm ta ṭhin a ni.

Kût ni zinga pakhat lawm dân tur Pathianin Israel fate a hrilh khan hetiang hian a sawi a: “Chu mi tlai lam aṭanga tlai lam leh thleng chu chawlhni-ah inhmang tur a ni,” (Leviticus 23:32). “Tlai” tih hian káwla nî liam/tla sawina a ni a; chuvângin, tlai ni tlák tia sawi a ni. “Tlai ni tlákah….(Deuteronomy 16:6) tiin. “Tin, tlaiah nî a tlák hnu chuan…” (Marka 1:32) tih a ni bawk.

Babulon sal tánna aṭanga Israel fate Jerusalema an kir leh khân, Nehemia chuan Sabbath serh dân tur a zìrtîr a. Israel faten an ni tin hnathawhte Sabbath nîah an tih loh nan Nehemia’n, “Sabbath dâwna Jerusalem kulh kawngkhâr a thim deuh vêleh kawngkhârte khar tûrin thu ka pe a; tin, Sabbath a ral hmá loh chuan hawn loh tûrin thu a pe bawk a,” (Nehemia 13:15-19) tiin thu a pe a ni.

Zirtâwp tlai nî a tlákin, Sabbath a in ṭan chiah tihna a ni. Hei hi thîl siam hriatrêngna niin, thianghlim taka serh tur a ni (Exodus 20:8).

– Emily Thomsen